> أحمد من اليمن جاءته فرصة يروح كأس العالم في قطر، عن طريق بطاقة تشجيع اسمها هيا، و علشان يروح قطر راح تهريب من اليمن إلى السعودية ثم إلى الأردن ثم عمان ثم وصل قطر… أحمد دخل قطر في وقت كأس العالم، و قعد يدور على شغل في قطر ٤ شهور و مش لاقي … كان بيصلي في المسجد اللي جنب سكنه، وبعدين مرة اتمشى شوية بعيد، و راح مسجد ثاني و كان تقريبا في اليوم دا على موعد، لتغيير حياته تغيير غير عادي. قابل في صلاة المغرب الشيخ أبو ناصر و قاله عايز اشتغل ف أبو ناصر شافه و شاف إن أحمد عنده تشوه شديد بالعمود الفقري، قاله أنا هعالجك و أخده معاه بيته.

وأصبح من اليوم دا هدف من أهداف أبو ناصر، إزاي يعالج أحمد، و قاله هبعتك مصر لدكتور هاني عبدالجواد… أحمد كان كاسر مدة إقامته، و عليه غرامة في قطر، فأبو ناصر دفعها له، و كان جواز سفره غير صالح، فعمله جواز سفر جديد، و مكانش ينفع يجي من قطر على مصر مباشرة ف حجزله من قطر على عدن و بعدين على مصر. مش بس كدا دا بعت مع أحمد عم أحمد و أستاذ عبدالعزيز،لإنجاز المهمة…

كل دا آخذ وقتًا كبيرًا و أنا لسه مشفتش أحمد و معرفش حاجة عن القصة. لما شوفته قولتلهم الموضوع خطير طبعًا، لأن أحمد عنده تحدب عمود فقري شديد جدا، و ناشف ومع التحدب موجود اعوجاج عمود فقري فحكولي على قصة وصولهم لي، وأنا مستغرب جدا. أستاذ عبدالعزيز قالي إن عملية أحمد دي مشروع أبو ناصر… تخيل أبو ناصر بيبذل الجهد الرهيب دا علشان شاب عرفه بالصدفة، و دا أكبر مثال على الأسباب اللي ربنا بيسببها… يعني أحمد قعد بلاد تشيله و بلاد تحطه، علشان نصيبه كدا و ربنا كاتب له إنه هيعمل العملية دي و مشروع أبو ناصر مكتوب له ينجح…

المهم عملية أحمد كانت النهاردة و عدت على خير، و أحمد هيكون مبسوط جامد.

إن كان في وقت بين ما شوفت أحمد و موعد العملية … فأبو ناصر بعت أحمد يتفسح في الغردقة، علشان يروح عن نفسه قبل العملية و لما شوفت أحمد قبل العملية بيوم، لقيت عنده جراح بقوله منين دا يا أحمد قالي من الزحاليق،

ألف حمدا لله على سلامتك يا أحمد و ألف مبروك نجاح مشروعك يا أبو ناصر، دا أحلى مشروع شوفته في حياتي.