> يا قلبي المتعوب يا صابر على جور الزمن

يا ذي لك العادات مع الأيام في فرٍّ و كرّ

والحمد لك يا الله على ما جاء من خير و شر

يا ما عبر عالرأس شفت أهوال في بحر و بر

ولا حاجتي للمال تدفعني على شي له ضرر

باقول ذا يكفي وتبقى حجته قيد النظر

برفع له البيضاء إذا جاب الحقيقة في الخبر

لا طالت المدة على المحتاج يدخل في الخطر

الله يعين اللي عبر عمره يجر الحبل جر

ما باك يالهاجس تكدرني وتلقي بي كدر

ما بذكر الماضي ولا بنساه دفنته في الغدر

تمت بذكر المصطفى المختار سيدنا الأبر

صبرك على ما جابته ليام يالقلب الصبور

أيام تزعلني وبعض ايام تعبر في سرور

والشكر لك يا الله ياذي الجود من مؤمن شكور

لا البر طوعني ولا موج الكوارث في البحور

وجبة ليومي كافية فيها المسرة والحبور

ولي معه حجة يرسلها على جناح النسور

ما باه يخفيها إذا طالت يقصرها قصور

فيها الخطر مسموح ما بين المجبر والكسور

يغبش يبى المسنى على بير العمل قبل السحور

جددت أحزاني تذكرني بنبّاش القبور

لما يجي له وقت ثاني فيه عبرة للعبور

صلوا على المختار يا اهل الدار أنتم والحضور