> الجهود اللي تبذلها الجهات الرسمية مع المستثمرين في الدول القريبة والبعيدة كويسة ومش بطالة وقد حققت بعض أُكُلها في عدة مجالات برغم كل عوامل الهبريكيشن التي تشوب المعاملات اليمنية الأجنبية في جانب الهات وخذ بمعنى إنه هات حقي على جنب مع اللي باتستثمره للبلاد على حسابك.. وهذه طبعاً عادة يمنية قبيحة يمارسها غالباً للأسف ناس ما تقدرش تقول لهم لأ بسبب مراكزهم ومواقعهم ونفوذهم لأنهم يقدروا يخلوك تخسر دم قلبك في أي مشروع وبعدين با يقاسموك قسمة أخوة في مالك يا يعمبصوا لك الدنيا لما تخرج من المولد بلا حمص ولا متبل ولا بابا غنوج أو حتى فتوش - وهذه مقبلات تتبع الأكلات الشامية لمن يهمه الأمر- وخروجك بدون حتى حبة زيتون با يكون في زفة على مطربين إن شاء الله في نهاية المولد.

ونحنا هنا مانشتيش نقدم صورة سوداء عن الاستثمار في بلادنا.. يعني إنه مش كل مستثمر با يلاقي الدنيا كلها مسراقة في مسراقة، لا..لا.. في استثمارات ومستثمرين ناجحين في بلادنا في طول البلاد وعرضها واسألوهم بأنفسكم إنكان تشتوا وكل واحد بايهدر على قدر استثماراته.. وبعدين يجب أن لا ننسى إنه عندنا قوانين وضوابط وروابط للاستثمار مافيش أحسن منها على الورق.. بس في واحد مشكل كريجا صغير يجيب هذي القوانين كلها تاسع راصع هو إنه زيما أشرنا بتلميح سابق.. في عندنا كمان ناس مزرطين للستة والستين ولا يمشي عليهم قانون ولا بانون.. وبالتالي فإنك تتوه بين شكل الدولة وكيان الدون كورليون الأب الروحي الأسطوري للمافيا وشيخ مشايخ الدولة الخفية .. فمن هو الأقوى يا ترى؟! سألني هذا السؤال الأخ المستثمر الدمبعيصي خالص (وهذا على فكرة هو اسمه الثنائي) والذي قدمه لي الأخ بشبوش أبو الريش بالصدفة المحضة بينما كنا نتعشى مخبازة في صيرة ونحتسي الشاهي الملبّن على حساب الأخ أبو الريش حتى لا يروح بالكم بعيد وتحسبوا انه الدمبعيصي خالص هذا هو خالص مالص وكمان بالص على رأي السيدة «شويكار طوب صقال» الفنانة المعروفة باسم شويكار اختصاراً يعني وحرم الفنان الكبير فؤاد المهندس سابقاً.

قال لي الدمبعيصي ويا ريته ما قال: آآي.. آي آآح .. أحيه..أحيه أنا اللي أستاهل كل اللي يجرى لي.. قلت له مهدئاً: تقصد إنه الغالي بعته رخيص ولا تحسبوش غالي؟ قال : أيواااه.. أيوه.. هو هذا الخبر هو.. قلت له بس يا أستاذ دمبعيصي هذا شيء عادي جداً عندنا زيه زي اسمك خالص مالص وكمان بالص .. قال الأخ الدمبعيصي وهو يهز رأسه وينعش يميناً ويساراً وإلى كل الاتجاهات في الخلف والأمام والوسط حتى إنه كاد أن يوقع كوفيته فوق مطيبة الحلبة لولا أن بشبوش أبو الريش سحب المطيبة بيده في خفة الرَّبْح وبراعته.. شباش أبو الريش .. شباش عليكم.. المهم بعدما نعش الدمبعيصي لما قال بس.. قال: إذا كان هذا شيء عادي عندكم أنا أيش لأمّي أكشح نفسي عندكم مع زمرة المستثمرين؟ أنا اتربيت كثير في اليمن.. والمثل يقول اللي ما تربيه أمّه وأبوه تربيه الجمهورية اليمنية.. قلت له: المهم إنك ماخرجتش فاضي.. على الأقل اتربيت وذا درس مهم ومش بسيط.

ذلحين يا أخواني في السلطة اللي سلطها علينا ربنا خلونا قليل نتصارح بجد.. أنتم في كل حين ومين تصيحوا في كل مكان إنكم تشتوا استثمارات في اليمن وأن عندكم ضمانات جرنتي فص قلص ولا خلّيتوا مكان إلا وطرّبتوا فيه تطالبوا بالاستثمارات وتناشدوا المستثمرين بالمجيء إلينا لما خزّيتوا بنا وخليتوا وجوهنا كما اللبّه فهل يعني يا معنى من صدق عندكم ضمانات للمستثمرين؟ وقد قال المثل أيش بختي يا أم الفال قالت أرمي بياضك منشان مايوقعلكش زي اللي وقع للدمبعيصي، فإذا كان عندكم ضمانات أرموا بياضكم ووروا للناس الدمبعيصيين خالص مالص هذه الضمانات وفعالياتها وفين مشت ومتى ولا تقولوا إنه في قانون وما أدراك ما قانون، لأنه زيما في قانون في اللي يكسروا القانون ولا أحد يصلح بهم شيء.. وإذا حد حاول يصلح بهم أي شيء لاقوا اللي يخارجهم ولا يقدر يوقف في وجوههم أكبر دمبعيصي على وجه الأرض!

في كمان سؤال ثاني لو سمحتوا يعني فقد سمعنا في الأخبار هذا الأسبوع أن اليمن ستحصل على مساعدة مليار ونصف مليار دولار (أيوه دولار) لمواجهة المشكلة المستفحلة الخاصة بنقص المياه.. فهل يا ترى يا أهل الحل والعقد والربط والزبط بانعرف منكم: كم بايسترق من هذي الفلوس وكم با يبقى منها نشرب به ماء؟!